വിവാഹ വാഗ്ദാനം ചെയ്ത് പീഡിപ്പിച്ചു
വിവാഹിതനായ യുവാവ് അറസ്റ്റില്
ആലക്കോട്: കോളജ് വിദ്യാര്ത്ഥിനിയെ പ്രണയം നടിച്ച് വലയിലാക്കി നാടുവിട്ട വിവാഹിതനായ യുവാവ് അറസ്റ്റില്. കൊല്ലം കടയ്ക്കല് ഇടത്തറ സ്വദേശി തെങ്ങരികത്ത് വീട്ടില് രജിത്ത് എന്ന കൊച്ച്മോനെ (26) ആലുവയില് ആലക്കോട് സി.ഐ രാജേഷ് വാഴാളപ്പിലിന്റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്.
കരുവഞ്ചാലില് കോളജ് വിദ്യാര്ത്ഥിനിയായ ആലക്കോട് കരിങ്കയം സ്വദേശി സുധ (21)യെ പ്രണയംനടിച്ച് വിവാഹവാഗ്ദാനം നല്കി കഴിഞ്ഞ നാലാം തിയ്യതി ഇയാള്ക്കൊപ്പം നാടുവിടുകയായിരുന്നു. പെണ്കുട്ടിയെ കാണാതായതിനെ തുടര്ന്ന് വീട്ടുകാര് ആലക്കോട് പോലീസില് പരാതി നല്കിയിരുന്നു. തുടര്ന്നുള്ള അന്വേഷണത്തില് സുധ രജിത്തിന്റെ കൂടെ നാടുവിട്ടതാണെന്ന് ബോധ്യമായി.
നേരത്തെ വിവാഹിതനായ കാര്യം മറച്ചുവെച്ചാണ് രജിത്ത് വിദ്യാര്ത്ഥിനിയുമായി ബന്ധം സ്ഥാപിച്ചത്. തളിപ്പറമ്പില്വെച്ച് രജിസ്റ്റര് വിവാഹം ചെയ്യാമെന്ന് യുവതി പറഞ്ഞെങ്കിലും ഇയാള് തയ്യാറായില്ലത്രെ. നേരെ പാലക്കാട്ടേക്ക് പോയ ശേഷം അവിടെവെച്ച് തന്നെ പീഡിപ്പിച്ചുവെന്നാണ് പെണ്കുട്ടി പറയുന്നത്. പിറ്റേദിവസം തമിഴ്നാട് പളനിയിലേക്കാണ് ഇവര് പോയത്. അവിടെവെച്ച് പെണ്കുട്ടിയുടെ പണവും സ്വര്ണവും ഇയാള് കൈക്കലാക്കി. ഇതിനിടയില് രജിത്ത് വിവാഹിതനാണെന്നും താന് വഞ്ചിക്കപ്പെടുകയാണെന്നും മനസ്സിലാക്കിയ പെണ്കുട്ടി വീട്ടുകാരുമായി ബന്ധപ്പെട്ടു. തുടര്ന്ന് ഇരുവരും ആലുവയിലെ ഒരു ബന്ധുവീട്ടിലെത്തുകയായിരുന്നു. അവിടെവെച്ചാണ് പോലീസ് യുവാവിനെ അറസ്റ്റ് ചെയ്തത്.
ചെങ്ങളായി നെല്ലിക്കുന്ന് സ്വദേശിനിയെയാണ് രജിത്ത് വിവാഹം ചെയ്തത്.
Subscribe to:
Post Comments (Atom)
No comments:
Post a Comment