ഓട്ടോയിടിച്ച്‌
മധ്യവയസ്‌കന്‌ പരുക്ക്‌
പരിയാരം: റോഡ്‌ മുറിച്ചുകടക്കവെ ഓട്ടോറിക്ഷ തട്ടി മധ്യവയസ്‌കന്‌ ഗുരതരമായി പരുക്കേറ്റു. ഇന്നലെ രാവിലെ തിരുമേനി പ്രാപ്പൊയിലിലാണ്‌ സംഭവം. പരുക്കേറ്റ മരോട്ടിക്കല്‍ ഹൗസില്‍ ജോസഫിന്റെ മകന്‍ ജോയി (52)യെ പരിയാരം മെഡിക്കല്‍കോളജ്‌ ആസ്‌പത്രിയില്‍ പ്രവേശിപ്പിച്ചെങ്കിലും പരുക്ക്‌ ഗുരുതരമായതിനാല്‍ പിന്നീട്‌ മംഗലാപുരത്തെ ആസ്‌പത്രിയിലേക്ക്‌ മാറ്റി.
ടിപ്പര്‍ ലോറി ഇടിച്ച്‌ വഴിയാത്രക്കാരന്‍ മരിച്ചു
തലശ്ശേരി: ടിപ്പര്‍ ലോറി ഇടിച്ച്‌ വഴിയാത്രക്കാരന്‍ മരിച്ചു
ചെണ്ടയാട്ടെ പൂവന്‍ വഴിയില്‍ ബാലന്‍(42)ആണ്‌ മരിച്ചത്‌. ഇന്നലെ വൈകീട്ട്‌ 6.30 ഓടെയാണ്‌ ചെണ്ടയാട്‌ ഗുരുദേവ്‌ സ്‌മാരക യു.പി സ്‌കൂളിനു സമീപമാണ്‌ സംഭവം. പിറകോട്ടെടുത്ത ടിപ്പര്‍ ബാലനെ ഇടിക്കുകയായിരുന്നു. ഗുരുതരമായി പരിക്കേറ്റ ഇയാളെ തലശ്ശേരി ഇന്ദിരാഗാന്ധി ആസ്‌പത്രിയില്‍ എത്തിച്ചെങ്കിലും രക്ഷിക്കാനായില്ല. ചാത്തു, ചിരുത ദമ്പതികളുടെ മകനാണ്‌. ഭാര്യ: അജിത. മക്കള്‍: അഭിജിത്ത്‌, അമൃത. സഹോദരങ്ങള്‍: നാണു, ചന്ദ്രന്‍, ബാബു. മൃതദേഹം തലശ്ശേരി പോലീസ്‌ ഇന്‍ക്വസ്റ്റ്‌ നടത്തി.


കടയില്‍ കയറി അക്രമം അഞ്ചരക്കണ്ടിയില്‍ ്‌ ഹര്‍ത്താല്‍
അഞ്ചരക്കണ്ടി: കടയില്‍ കയറി അക്രമം നടത്തുകയും ജീവനക്കാരനെ മര്‍ദ്ദിക്കുകയും ചെയ്‌തു. അക്രമത്തില്‍ പ്രതിഷേധിച്ച്‌ അഞ്ചരക്കണ്ടിയില്‍ ഇന്ന്‌ ഹര്‍ത്താല്‍.
അഞ്ചരക്കണ്ടി ജുമാമസ്‌ജിദിനു മുന്‍വശത്തെ ചന്ദ്രിക ഏജന്റും മില്‍മ ബൂത്ത്‌ നടത്തിപ്പുകാരനുമായ പി.പി മമ്മൂട്ടിയുടെ കടയില്‍ കയറിയാണ്‌ രണ്ടംഗ സംഘം അക്രമം നടത്തിയത്‌. അക്രമത്തില്‍ മമ്മൂട്ടിയുടെ മകനും ബൂത്ത്‌ ജീവനക്കാരനുമായ എ.വി ജംഷീദി(19)ന്‌ പരിക്കേറ്റു. ഇയാളെ കണ്ണൂര്‍ മെഡിക്കല്‍ കോളേജ്‌ ആസ്‌പത്രിയില്‍ പ്രവേശിപ്പിച്ചു. ഇന്നലെ വൈകുന്നേരം 6 മണിയോടെയാണ്‌ അക്രമം. കഴിഞ്ഞയാഴ്‌ച മമ്മൂട്ടിയുടേയും അടുത്ത വീട്ടിലെ മുസ്‌തഫയുടേയും വീട്ടുവരാന്തയില്‍ നിന്നും ഗ്യാസ്‌ സിലിണ്ടര്‍ മോഷണം പോയിരുന്നു. സംഭവവുമായി ബന്ധപ്പെട്ട്‌ കല്ലായിലെ കെ.പി ശഫീറി(28)നെതിരെ പോലീസില്‍ പരാതിപ്പെടുകയും ഇയാളെ കസ്റ്റഡിയിലെടുക്കുകയും ചെയ്‌തിരുന്നു. ഈ വൈരാഗ്യമാണ്‌ അക്രമത്തിനു കാരണമെന്ന്‌ കടയുടമ മമ്മൂട്ടി പറഞ്ഞു.
സംഭവമറിഞ്ഞ്‌ കൂത്തുപറമ്പ്‌ എ.എസ്‌.ഐ രവീന്ദ്രന്റെ നേതൃത്വത്തില്‍ പോലീസ്‌ സ്ഥലത്തെത്തി കേസെടുത്തു. വ്യാപാരി വ്യവസായി ഏകോപന സമിതി യൂനിറ്റ്‌ കമ്മിറ്റിയുടെ നേതൃത്വത്തില്‍ ഇന്ന്‌ ഉച്ചവരെയാണ്‌ ഹര്‍ത്താല്‍.